ഉപരിപഠനത്തിനായി ‘കർണാടക’ തിരഞ്ഞെടുക്കുമ്പോൾ

കർണാടകയിൽ ഉപരിപഠന പ്രവേശനം ലക്ഷ്യമിടുന്ന വിദ്യാർത്ഥികളും രക്ഷിതാക്കളും നിര്‍ബന്ധമായും അറിയേണ്ട ചില സംഗതികളുണ്ട്. കർണ്ണാടകയിലെ വിവിധ കോളേജുകളിലേക്ക് 2024 -25 അധ്യയന വർഷത്തേക്കുള്ള മെഡിക്കൽ, മെഡിക്കൽ അലൈഡ് കോഴ്സുകൾ, ബിഎസ്.സി നഴ്സിംഗ് പ്രവേശനവുമായി ബന്ധപ്പെട്ട ചില വിവരങ്ങളാണിവിടെ നൽകുന്നത്.

കർണ്ണാടക ഗവൺമെന്റിന്റെയും രാജീവ്ഗാന്ധി ആരോഗ്യ യുണിവേഴ്സിറ്റിയുടെയും ഉത്തരവ് പ്രകാരം 2024-25 അധ്യയന വർഷം മുതൽ ബി.എസ്.സി നഴ്സിംഗ് കോഴ്സിലേക്കുള്ള പ്രവേശനം കർണ്ണാടക എക്സാമിനേഷൻ അഥോറിറ്റി (KEA) നടത്തുന്ന കോമൺ എൻട്രൻസ് ടെസ്റ്റ് (CET) വഴി മാത്രം ആയിരിക്കും.

നഴ്സിംഗ് പഠനത്തിനായി മലയാളികൾ പ്രധാനമായും ആശ്രയിക്കുന്ന ബാംഗ്ലൂർ, മൈസൂർ, മംഗലാപുരം അടക്കം കർണാടകയിലെ എല്ലായിടത്തുമുള്ള കോളേജുകളിൽ എൻട്രൻസ് റാങ്ക് അടിസ്ഥാനത്തിൽ ചേരുവാൻ കുട്ടികൾക്ക് ലഭിക്കുന്ന നല്ലൊരു അവസരമായിരിക്കും ഇത്. CET അറ്റന്‍ഡ് ചെയ്ത് റാങ്ക് ലിസ്റ്റിൽ ഉള്ള കുട്ടികൾക്ക് മാത്രമേ ഈ വർഷം മുതൽ എല്ലാത്തരം ക്വോട്ട സീറ്റുകളിലും അഡ്മിഷൻ നൽകാവൂ എന്നാണ് കർണാടക ഗവൺമെന്റിന്റെ നിലപാട്.

അതുകൊണ്ട് തന്നെ കർണ്ണാടകയിൽ നഴ്സിംഗ് പഠനം ആഗ്രഹിക്കുന്ന എല്ലാ കുട്ടികളും Karnataka Examination Authority യുടെ CET എഴുതുവാൻ രജിസ്റ്റർ ചെയ്യാൻ ശ്രദ്ധിക്കേണ്ടതുണ്ട്. CET എക്സാമിന് ഓൺലൈൻ രജിസ്റ്റർ ചെയ്യാനുള്ള ലിങ്കും പ്രധാന തിയ്യതികളും താഴെ കൊടുക്കുന്നു:

CET 2024 Online Registration Link:
https://cetonline.karnataka.gov.in/UGONLINEAPPLICATION_2024/FORMS/APPCHECKLIST.ASPX

രജിസ്ട്രേഷൻ ആരംഭിച്ച തീയതി – 10-Jan-2024

രജിസ്ട്രേഷൻ അവസാനിക്കുന്ന തീയതി – 10-Feb-2024

CET എക്സാം ദിവസങ്ങൾ – 18-Apr-2024 & 19-Apr-2024

മെഡിക്കൽ അലൈഡ് കോഴ്സുകൾക്കും സർക്കാർ എഞ്ചിനീയറിങ് സീറ്റുകൾക്കും ഇത് തന്നെയാണ് കണ്ടീഷൻ. മെഡിക്കൽ – ബിഡിഎസ് പ്രവേശനം തേടുന്നവരും ഇപ്പോൾ അപേക്ഷിക്കണം. മുൻ വർഷങ്ങളിൽ ഉണ്ടായ പോലെ നീറ്റ് പരീക്ഷ റിസൾറ്റ് വന്നു കഴിഞ്ഞുള്ള അപേക്ഷാ സമർപ്പണ വിൻഡോ ഇനിയില്ല. റിസൾട്ട് വന്ന് റോൾ നമ്പറും റാങ്കും ചേർക്കാനെ ഇനി അവസരമുള്ളൂ. ഗഡിനാഡു ഹൊറനാടു അപേക്ഷകർ എഴുതേണ്ട കന്നട ടെസ്റ്റിനും ഇപ്പോൾ അപേക്ഷിക്കണം. ഇനി വീണ്ടും അവസരമോ പരീക്ഷയോ ഇല്ല.
ഒരു രൂപ ഫീസില്ലാതെ സത്യസായി കോളേജിൽ മെഡിക്കൽ പ്രവേശനമാഗ്രഹിക്കുന്നവരും ഇപ്പോഴേ CET ലക്ഷ്യമിടണം. സ്വകാര്യ എഞ്ചിനീയറിംഗ് കോളേജുകളിൽ പ്രവേശനമാഗ്രഹിക്കുന്നവർ കോമെഡ്‌കെ (COMEDK) എഴുതേണ്ടതാണ്.
മറക്കരുത് … അവസരങ്ങൾ ഒരിക്കലേ തേടി വരൂ