പുതിയ അധ്യയന വര്‍ഷം ആരംഭിച്ചു. പാഠഭാഗങ്ങള്‍ പഠിപ്പിച്ചു കൊടുക്കുന്നതോടൊപ്പം തന്നെ അധ്യാപകര്‍ക്ക് തങ്ങളുടെ വിദ്യാര്‍ത്ഥികള്‍ക്കായി ഏറെ കാര്യങ്ങള്‍ ചെയ്യാനാകും. പത്തിലും പന്ത്രണ്ടിലും പഠിക്കുന്നവര്‍ക്ക് കരിയർ ഗൈഡിങ്ങിന്റെ കുറച്ച് മന്ത്രങ്ങളും അധ്യാപകർ പറഞ്ഞ് കൊടുക്കേണ്ടതുണ്ട്.
കരിയർ കൗൺസലിംഗ് എന്നത് വെറും വിവരങ്ങൾ നൽകുന്ന ഒരു പ്രക്രിയയല്ല, മറിച്ച് വ്യക്തികളുടെ സ്വപ്നങ്ങളും ആശങ്കകളും ഭാവിയും കൂടിക്കലരുന്ന ഒരു മനുഷ്യബന്ധമാണ്. കരിയർ ഗൈഡുമാർക്ക് പാഠപുസ്തകങ്ങളിൽ നിന്ന് ലഭിക്കാത്ത ചില യാഥാർത്ഥ്യങ്ങളുണ്ട്. ഓരോ കൗൺസലിംഗ് സെഷനും ഓരോ അനുഭവ പാഠമാണ്. ചില അനുഭവ കഥകളിലൂടെ കരിയർ ഗൈഡുമാർ അറിഞ്ഞിരിക്കേണ്ട ആഴത്തിലുള്ളതും കാമ്പുള്ളതുമായ ചെറിയ യാഥാർത്ഥ്യങ്ങൾ ഇവിടെ പങ്കുവെക്കുന്നു.
- സ്വന്തം താത്പര്യങ്ങളെ കുറിച്ചുള്ള അജ്ഞത
പലപ്പോഴും വിദ്യാർത്ഥികൾക്ക് സ്വന്തം താൽപ്പര്യങ്ങളെക്കുറിച്ച് വ്യക്തമായ ധാരണയുണ്ടാകില്ല. അല്ലെങ്കിൽ മറ്റുള്ളവരുടെ പ്രതീക്ഷകളുടെയും സാമൂഹിക സമ്മർദ്ദത്തിന്റെയും ഭാരം പേറി തെറ്റായ കരിയർ തിരഞ്ഞെടുപ്പുകളിലേക്ക് അവർ നടന്നടുക്കുന്നു.
ഒരു ദിവസം, പ്ലസ് ടു കഴിഞ്ഞ ഒരു മിടുക്കനായ വിദ്യാർത്ഥി കൗൺസലിങ്ങിനായി എത്തി. മാർക്ക് ലിസ്റ്റ് കണ്ടപ്പോൾ എൻജിനീയറിങ്ങിന് മികച്ച സാധ്യതകളുണ്ടെന്ന് തോന്നി. എന്നാൽ സംസാരത്തിനിടെ അവന്റെ താത്പര്യം കലാരംഗത്തും എഴുത്തിലുമാണെന്ന് മനസ്സിലായി. സംസാരത്തിനിടയില്‍ ‘എൻജിനീയറായാൽ നല്ല ശമ്പളം കിട്ടുമെന്നും സമൂഹത്തിൽ അംഗീകാരമുണ്ടെന്നും കൂട്ടുകാർ പറഞ്ഞു’, ‘അച്ഛനും അമ്മയ്ക്കും എന്നെ ഒരു എൻജിനീയറായി കാണാനാണ് ഇഷ്ടം’ എന്നൊക്കെയാണ് ആ വിദ്യാര്‍ത്ഥി പറഞ്ഞത്.
കൗൺസലർമാർ വെറും വിവരങ്ങൾ നൽകുക മാത്രമല്ല, ഒരു കുട്ടിയുടെ യഥാർത്ഥ അഭിരുചികൾ കണ്ടെത്താനും അതിനനുസരിച്ചുള്ള ധൈര്യം നൽകാനും ശ്രമിക്കണം. ഓരോ വ്യക്തിക്കും അവരുടേതായ പാതയുണ്ടെന്നും, അത് മറ്റൊരാളുടെ വിജയ ഫോർമുല ആകണമെന്നില്ലെന്നും അവരെ ബോധ്യപ്പെടുത്തണം.
- രക്ഷിതാക്കളില്‍ നിന്നുണ്ടാകുന്ന സമ്മര്‍ദം
ഒരു രക്ഷിതാവ് മകളുമായി കൗൺസലിങ്ങിനായി വന്നത് ഓർക്കുന്നു. മകൾക്ക് സയൻസ് വിഷയങ്ങളോട് വലിയ താൽപ്പര്യമില്ലായിരുന്നു, പ്രത്യേകിച്ച് ബയോളജിയോട്. അവൾക്ക് കോമേഴ്‌സ് വിഷയങ്ങളോടായിരുന്നു അടുപ്പം. പക്ഷേ, അച്ഛന്റെ സ്വപ്നം അവളെ ഒരു ഡോക്ടറാക്കുക എന്നതായിരുന്നു. മകളുടെ ഇഷ്ടത്തിന് അവിടെ പ്രസക്തിയുണ്ടായിരുന്നില്ല. ‘ഞങ്ങൾക്ക് എത്ര ചിലവായാലും സാരമില്ല, അവൾ ഡോക്ടറാകണം’, അച്ഛൻ ആവർത്തിച്ചു.
രക്ഷിതാക്കളുടെ സ്വപ്നങ്ങൾ മക്കളുടെ മേൽ അടിച്ചേൽപ്പിക്കുന്നത് സാധാരണ കാഴ്ചയാണ്. മക്കളുടെ കഴിവുകളും താൽപ്പര്യങ്ങളും മനസ്സിലാക്കാതെ, സ്വന്തം ആഗ്രഹങ്ങൾ അവരിലൂടെ നിറവേറ്റാൻ ശ്രമിക്കുമ്പോൾ ഭാവിയിൽ അവർക്ക് നിരാശയും സമ്മർദ്ദവുമാണ് ലഭിക്കുക. കരിയർ ഗൈഡുമാർക്ക് രക്ഷിതാക്കളുമായും വിദ്യാർത്ഥികളുമായും ഒരേ സമയം ആശയവിനിമയം നടത്താനുള്ള കഴിവ് അത്യാവശ്യമാണ്. മക്കളുടെ താൽപ്പര്യങ്ങൾ തിരിച്ചറിയാൻ രക്ഷിതാക്കളെ സഹായിക്കുകയും, അതുവഴി അവർക്ക് അനുയോജ്യമായ കരിയർ തിരഞ്ഞെടുക്കാൻ പിന്തുണ നൽകുകയും ചെയ്യേണ്ടത് പ്രധാനമാണ്.
- കരിയര്‍ ഇന്‍ഫര്‍മേഷന്‍ ലഭ്യമാകുന്നതിലുള്ള അഭാവം
അത്യാവശ്യം നല്ല മാർക്കുള്ള ഒരു വിദ്യാർത്ഥിക്ക് സിവിൽ എൻജിനീയറിങ്ങിനോട് താൽപ്പര്യമുണ്ടായിരുന്നു. എന്നാൽ, ആ മേഖലയിലെ പുതിയ സാങ്കേതിക വിദ്യകളെക്കുറിച്ചോ, ഡിസൈനിംഗ്, കൺസ്ട്രക്ഷൻ മാനേജ്മെന്റ്, അർബൻ പ്ലാനിംഗ് തുടങ്ങിയ അനുബന്ധ കോഴ്സുകളെക്കുറിച്ചോ അവന് യാതൊരു ധാരണയുമില്ലായിരുന്നു. പരമ്പരാഗതമായ ഏതാനും കോഴ്സുകൾ മാത്രമാണ് അവനറിയാവുന്നത്.
ഇന്റർനെറ്റും വിവര സാങ്കേതിക വിദ്യയും വളർന്നെങ്കിലും, പല വിദ്യാർത്ഥികൾക്കും രക്ഷിതാക്കൾക്കും കരിയർ സാധ്യതകളെക്കുറിച്ചുള്ള വിവരങ്ങൾ പൂർണ്ണമായി ലഭ്യമല്ല. എന്തിന്, പുതിയതും വളർന്നു വരുന്നതുമായ കോഴ്സുകളെയും ജോലികളെയും കുറിച്ചുള്ള വിശ്വാസയോഗ്യമായ വിവരങ്ങള്‍ അധ്യാപകര്‍ക്ക് പോലും അജ്ഞമാണ്.
അറിവിന്റെ വലിയൊരു വിടവ് നികത്താൻ കരിയർ ഗൈഡുമാർക്ക് ഉത്തരവാദിത്തമുണ്ട്. അറിവില്ലായ്മ പലപ്പോഴും തെറ്റായ തിരഞ്ഞെടുപ്പുകളിലേക്ക് നയിച്ചേക്കാം. ഏറ്റവും പുതിയ ട്രെൻഡുകളെക്കുറിച്ചും വളർന്നു വരുന്ന തൊഴിൽ മേഖലകളെക്കുറിച്ചും എപ്പോഴും അറിവ് നേടാൻ കൗൺസലർമാർക്ക് കഴിയണം.
- സാമൂഹിക പരിമിതികള്‍ തീര്‍ക്കുന്ന തടസ്സങ്ങള്‍
ഒരു ഉൾനാടൻ ഗ്രാമത്തിൽ നിന്ന് വന്ന ഒരു പെൺകുട്ടിക്ക് കമ്പ്യൂട്ടർ സയൻസിൽ താൽപ്പര്യമുണ്ടായിരുന്നു. എന്നാൽ, ‘പെൺകുട്ടികൾക്ക് ഈ മേഖലയിൽ ശോഭിക്കാൻ കഴിയില്ലെന്നും, വിവാഹം കഴിഞ്ഞാൽ ജോലിക്ക് പോകാൻ പ്രയാസമാണെന്നും’ വീട്ടുകാർ പറയുന്നുണ്ടെന്ന് അവൾ വിഷമത്തോടെ പറഞ്ഞു. തന്റെ ഇഷ്ടത്തെക്കാൾ സമൂഹത്തിന്റെയും വീട്ടുകാരുടെയും ഈ കാഴ്ചപ്പാടാണ് അവളെ സ്വാധീനിച്ചത്.
ലിംഗ ഭേദം, സാമൂഹിക-സാമ്പത്തിക ചുറ്റുപാടുകൾ, പ്രാദേശിക വിശ്വാസങ്ങൾ തുടങ്ങിയ പല കാരണങ്ങളും ഒരു വ്യക്തിയുടെ കരിയർ തിരഞ്ഞെടുപ്പിനെ സ്വാധീനിക്കുന്നുണ്ട്. ചിലപ്പോൾ വിദ്യാർത്ഥിയുടെ കഴിവോ താൽപ്പര്യമോ പരിഗണിക്കപ്പെടാതെ ഇത്തരം ബാഹ്യ ഘടകങ്ങൾ ഒരു ഭീഷണിയാകാം. കൗൺസലർമാർക്ക് ഇത്തരം സാമൂഹിക യാഥാർത്ഥ്യങ്ങളെക്കുറിച്ച് ബോധ്യമുണ്ടായിരിക്കണം. വിവരങ്ങൾക്കപ്പുറം, വിദ്യാർത്ഥികൾക്ക് ആത്മവിശ്വാസം നൽകാനും, അവരുടെ തിരഞ്ഞെടുപ്പുകൾക്ക് പിന്നിൽ നിൽക്കാനും, ആവശ്യമെങ്കിൽ കുടുംബാംഗങ്ങളെ കാര്യങ്ങൾ പറഞ്ഞ് മനസ്സിലാക്കാനും ഒരു കൗൺസലർക്ക് കഴിയണം.
- സാമ്പത്തിക ഭാരം തീര്‍ക്കുന്ന പ്രതിബന്ധങ്ങള്‍
മിടുക്കനായ ഒരു വിദ്യാർത്ഥിക്ക് ആനിമേഷൻ കോഴ്സ് പഠിക്കാൻ അതിയായ ആഗ്രഹമുണ്ടായിരുന്നു. എന്നാൽ, ആനിമേഷൻ കോഴ്സുകൾക്ക് ഉയർന്ന ഫീസാണെന്നും, അത് താങ്ങാൻ തങ്ങളുടെ കുടുംബത്തിന് കഴിയില്ലെന്നും രക്ഷിതാക്കൾ വിഷമത്തോടെ അറിയിച്ചു. കുറഞ്ഞ ഫീസിലുള്ള ഏതെങ്കിലും പരമ്പരാഗത കോഴ്സ് മതിയെന്ന് അവർ പറഞ്ഞു.
സാമ്പത്തിക സ്ഥിതി പലപ്പോഴും വിദ്യാർത്ഥികളുടെ സ്വപ്നങ്ങൾക്ക് തടസ്സമാകാറുണ്ട്. ഈ സാഹചര്യത്തിൽ, കൗൺസലർമാർക്ക് വിവിധ സ്കോളർഷിപ്പുകളെക്കുറിച്ചും വിദ്യാഭ്യാസ ലോണുകളെക്കുറിച്ചും വിവരങ്ങൾ നൽകാൻ കഴിയണം. അല്ലെങ്കിൽ, ആ താൽപര്യ മേഖലയിൽ തന്നെ ചിലവ് കുറഞ്ഞ മറ്റ് കോഴ്സുകൾ, ഓൺലൈൻ പ്ലാറ്റ്ഫോമുകൾ, ഡിപ്ലോമകൾ എന്നിവ നിർദ്ദേശിച്ച് അവരെ സഹായിക്കാൻ കഴിയണം.
- തൊഴിൽ വിപണിയിലെ മാറ്റങ്ങൾ
പത്ത് വർഷം മുൻപ് താനൊരു സർക്കാർ ജോലിക്കാരനായതുകൊണ്ട്, ഇന്നും സർക്കാർ ജോലി നേടുന്നതാണ് ഏറ്റവും സുരക്ഷിതം എന്ന് വാദിക്കുന്ന ഒരു രക്ഷിതാവിനെ കണ്ടുമുട്ടി. മാറിക്കൊണ്ടിരിക്കുന്ന തൊഴിൽ വിപണിയെക്കുറിച്ചോ, പുതിയ ജോലികൾക്ക് ആവശ്യമായ വൈദഗ്ധ്യങ്ങളെക്കുറിച്ചോ അദ്ദേഹത്തിന് അറിവില്ലായിരുന്നു.
തൊഴിൽ വിപണി അതിവേഗം മാറിക്കൊണ്ടിരിക്കുകയാണ്. ഇന്നലത്തെ നല്ല കോഴ്സ് നാളത്തെ മികച്ച കോഴ്സ് ആകണമെന്നില്ല. ഓട്ടോമേഷൻ, ആർട്ടിഫിഷ്യൽ ഇന്റലിജൻസ്, ഡാറ്റാ സയൻസ് എന്നിവയൊക്കെ പുതിയ തൊഴിലവസരങ്ങൾ സൃഷ്ടിക്കുമ്പോൾ തന്നെ ചില പരമ്പരാഗത ജോലികളുടെ പ്രസക്തി കുറയ്ക്കുന്നുണ്ട്. കൗൺസലർമാർക്ക് ഭാവിയിലെ തൊഴിൽ സാധ്യതകൾ പ്രവചിക്കാൻ കഴിഞ്ഞില്ലെങ്കിലും പുതിയ ട്രെൻഡുകളെക്കുറിച്ചും ഭാവിയിൽ ഡിമാൻഡ് വരാൻ സാധ്യതയുള്ള മേഖലകളെപ്പറ്റിയും വ്യക്തമായ ധാരണയുണ്ടായിരിക്കണം.
- മാനസികാരോഗ്യ പ്രശ്നങ്ങൾ
മികച്ച അക്കാദമിക പശ്ചാത്തലമുള്ള ഒരു വിദ്യാർത്ഥി, പെട്ടെന്ന് പഠനത്തിൽ പിന്നോട്ട് പോവുകയും കരിയറിനെക്കുറിച്ച് യാതൊരു താൽപ്പര്യവും കാണിക്കാതിരിക്കുകയും ചെയ്ത ഒരനുഭവമുണ്ട്. നിരന്തരമായ സംസാരത്തിലൂടെ അവന് ഡിപ്രഷന്റെ ലക്ഷണങ്ങൾ ഉണ്ടെന്നും, പഠന സമ്മർദ്ദമാണ് അതിന് കാരണമെന്നും മനസ്സിലായി.
കരിയർ കൗൺസലിംഗ് എന്നത് വെറും പാഠ്യപദ്ധതി നിർദ്ദേശിക്കലല്ല. വിദ്യാർത്ഥികളുടെ മാനസികാരോഗ്യവും വൈകാരികവുമായ അവസ്ഥകൾക്ക് വലിയ പ്രാധാന്യമുണ്ട്. കൗൺസലർമാർക്ക് ബേസിക് സൈക്കോളജിക്കൽ കൗൺസലിംഗ് കഴിവുകൾ ഉണ്ടായിരിക്കണം, അല്ലെങ്കിൽ അത്തരം സാഹചര്യങ്ങളിൽ ഒരു പ്രൊഫഷണൽ സൈക്കോളജിസ്റ്റിന്റെ സഹായം തേടാൻ നിർദ്ദേശിക്കാനുള്ള അറിവുണ്ടായിരിക്കണം.
- റീല്‍സ്/ ഇൻഫ്ലുവൻസർമാരുടെ സ്വാധീനം
ഒരു വിദ്യാർത്ഥിക്ക് ഒരു യൂട്യൂബ് ഇൻഫ്ലുവൻസർ ഒരു റീലിലൂടെ പറഞ്ഞ കോഴ്സ് പഠിക്കാൻ താൽപ്പര്യമുണ്ടായിരുന്നു. ആ കോഴ്സിന്റെ യഥാർത്ഥ സാധ്യതകളെക്കുറിച്ചോ, പഠിച്ചിറങ്ങിയവർക്ക് ലഭിക്കുന്ന തൊഴിൽ നിലവാരത്തെക്കുറിച്ചോ ആഴത്തിലുള്ള ധാരണയില്ലായിരുന്നു. ഇൻഫ്ലുവൻസറുടെ വാക്കുകൾ മാത്രം മതിയായിരുന്നു അവന്. റിയാലിറ്റി അറിയാതെ റീലിനെ വിശ്വസിച്ചു അവൻ.
സോഷ്യൽ മീഡിയയുടെയും ഇൻഫ്ലുവൻസർമാരുടെയും അതിപ്രസരമുള്ള ഇന്നത്തെ കാലത്ത്, കുട്ടികൾ പലപ്പോഴും തെറ്റായ വിവരങ്ങളിലോ പെട്ടെന്നുള്ള ആകർഷണങ്ങളിലോ വീഴാൻ സാധ്യതയുണ്ട്. കൗൺസലർമാർക്ക് വിശ്വസനീയമായ വിവര സ്രോതസ്സുകൾ ഏതൊക്കെയാണെന്ന് വിദ്യാർത്ഥികൾക്ക് പറഞ്ഞു കൊടുക്കാനും, ഒരു കരിയർ തിരഞ്ഞെടുപ്പിന് മുൻപ് നന്നായി ഗവേഷണം ചെയ്യേണ്ടതിന്റെ പ്രാധാന്യം ബോധ്യപ്പെടുത്താനും കഴിയണം. റീലിലല്ല, റിയാലിറ്റിയിലാണ് ശ്രദ്ധ വേണ്ടത് എന്ന് പറഞ്ഞ് കൊടുക്കണം.
- തുടര്‍ച്ചയായി പിന്തുണക്കുന്ന ഒരു മെന്ററാകണം
അഡ്മിഷൻ കിട്ടിയ ശേഷം, ചില വിദ്യാർത്ഥികൾക്ക് പഠന രീതി, ഇന്റൺഷിപ്പുകൾ, നെറ്റ്വർക്കിംഗ് എന്നിവയെക്കുറിച്ച് യാതൊരു ധാരണയുമില്ലായിരുന്നു. കോഴ്സിന് ചേർന്നാൽ എല്ലാം ശരിയാകുമെന്ന് അവർ കരുതി.
കരിയർ കൗൺസലിംഗ് അഡ്മിഷനോടുകൂടി അവസാനിക്കുന്നില്ല. കോഴ്സ് പഠിക്കുന്ന സമയത്ത് എങ്ങനെ പഠിക്കണം, പുതിയ സ്കില്ലുകൾ എങ്ങനെ നേടണം, ഇന്റൺഷിപ്പുകൾ എങ്ങനെ കണ്ടെത്തണം, നെറ്റ്വർക്കിംഗ് എങ്ങനെ നടത്തണം എന്നതിനെക്കുറിച്ചും വിദ്യാർത്ഥികൾക്ക് മാർഗ്ഗനിർദ്ദേശം ആവശ്യമാണ്. കൗൺസലർക്ക് ഒരു മെന്ററുടെ റോൾ കൂടി ഏറ്റെടുക്കാൻ കഴിയണം.
കരിയർ കൗൺസലിംഗ് എന്നത് വെറും തൊഴിൽ, തുടർ പഠന മാർഗ്ഗനിർദ്ദേശം നൽകൽ മാത്രമല്ല, അതൊരു വ്യക്തിയുടെ സ്വഭാവം, സാമൂഹിക പശ്ചാത്തലം, കഴിവുകൾ, താൽപ്പര്യങ്ങൾ എന്നിവയെല്ലാം മനസ്സിലാക്കി, അവരെ ശരിയായ പാതയിലേക്ക് നയിക്കുന്ന ഒരു ഹോളിസ്റ്റിക് പ്രക്രിയയാണ്.
Avcılar su kaçak tespiti Evimi Kırmadan Sorunu Çözdüler: Kırmadan su kaçağı tespiti hizmeti almak çok büyük bir kolaylık. Banyomuzda hiçbir yeri kırmadan problemi buldular. https://www.czechsportsagency.com/read-blog/6271
Sarıgazi su kaçak tespiti İstanbul’da su kaçağı tespiti yapmak isteyen herkese tavsiye ediyorum. Hizmet çok profesyoneldi. http://woorichat.com/read-blog/41060