ചോദ്യങ്ങൾ പൂത്തൊരു തണലിലല്ലോ
നാമന്ന് തുന്നിയ ജനാധിപത്യം!
ഇന്നതിൻ വേരുകൾ അരിഞ്ഞു വീഴ്ത്താൻ
ആരുടെ കയ്യാണ് ഓങ്ങുന്നത്?
നീതി നിഷേധങ്ങൾ പെരുകുന്ന നാട്ടിൽ
സ്വപ്നം കരിഞ്ഞ തരുണരെ നോക്കി,
നീതിക്കായ് ആളുന്ന സമരജ്വാലകൾ
ചോദ്യങ്ങൾ വീണ്ടും തൊടുത്തിടുന്നു!
വാഗ്ദാന ഭാണ്ഡങ്ങൾ നിരക്കും നാട്ടിൽ
മൗനം വെടിയുന്ന ചുണ്ടുകളെല്ലാം,
നീതി തൻ നാളമായി പടർന്നു പന്തലിക്കും
ചോദ്യങ്ങളൊന്നും തളരുകയില്ല!
തടയുന്തോറും പടരും സത്യം,
നിശ്ശബ്ദതയിലില്ല ജനാധിപത്യം!
തൊണ്ടയിൽ വീഴും വിലങ്ങുകൾ പൊട്ടിച്ച്
ചോദ്യങ്ങൾ എന്നും ഉയർന്നിടട്ടെ!