അടിതെറ്റിയാൽ ‘ആപ്പും’ വീഴും!

നീണ്ട 27 വർഷങ്ങൾക്ക് ശേഷം തലസ്ഥാന നഗരിയിൽ ബിജെപി അധികാരം പിടിച്ചിരിക്കുന്നു. പത്തു വർഷം നീണ്ടു നിന്ന ആം ആദ്മി ഭരണത്തിന് അന്ത്യം കുറിച്ച് കൊണ്ടാണ് ഇന്ദ്രപ്രസ്ഥത്തിൽ കാവിപ്പടയുടെ തേരോട്ടം.മുൻ മുഖ്യമന്ത്രിയും ആപ് ദേശീയ കൺവീനറുമായ അരവിന്ദ് കേജ്രിവാൾ, മുൻ ഉപ മുഖ്യമന്ത്രി മനീഷ് സിസോദിയ,സതേന്ദ്ര ജെയിൻ തുടങ്ങി പാർട്ടി യുടെ മുൻനിര നേതാക്കളിൽ പലരും പരാജയമേറ്റുവാങ്ങി.മുഖ്യമന്ത്രി അതിഷി അടക്കം ചുരുക്കംചില നേതാക്കൾക്ക് മാത്രമേ ബിജെപി കൊടുംകാറ്റിൽ പിടിച്ചു നിൽക്കാൻ കഴിഞ്ഞു ള്ളൂ.

2013ൽ ഷീല ദീക്ഷിതിന്റെ നേതൃത്വത്തിലുള്ള കോൺഗ്രസ്‌ സർക്കാരിനെ അട്ടിമറിച്ചു കൊണ്ടാണ് ആപ്പ് ആദ്യമായി അധികാരത്തിൽ വരുന്നത്. കോമൺ വെൽത്ത്, 2ജി സ്പെക്ട്രം തുടങ്ങി അഴിമതി ആരോപണങ്ങളിൽ നടുവിൽ രണ്ടാം UPA സർക്കാർ പിടിവിട്ട് നിൽക്കുന്ന കാലം. അവിടെ അണ്ണാ ഹസാരയെ മുൻനിർത്തി RSS നടത്തിയ ഇന്ത്യാ എഗൈൻസ്റ്റ് കറപ്ഷൻ എന്ന മൂവ് മെന്റിലൂടെയാണ് അരവിന്ദ് കേജ്രിവാൾ രംഗപ്രവേശനം ചെയ്യുന്നത്. പിന്നീട് അദ്ദേഹം രാഷ്ട്രീയ പാർട്ടി രൂപീകരിക്കുന്നു. അഴിമതി ആരോപണത്തിൽ മുങ്ങി നിന്ന ഷീല ദീക്ഷിത് സർക്കാരിനെ ആട്ടിമറിച്ചുകൊണ്ട് അധികാരത്തിലേറുന്നു.ആം ആദ്മി (COMMON MAN ) എന്നാണ് പാർട്ടിയുടെ പേരെങ്കിലും മാധ്യവർഗമായിരുന്നു എന്നും പാർട്ടിയുടെ ശക്തി. അഴിമതി വിരുദ്ധത എന്ന ഒറ്റ പോയിന്റിൽ അധികാരത്തിൽ വന്ന്, മധ്യവർഗത്തിന്റെ ആവശ്യങ്ങളിൽ ശ്രദ്ധയൂന്നിയായിരുന്നു പാർട്ടിയുടെ ഭരണം.
ഇതിനിടയിൽ ഡൽഹിയിൽ മോഹല്ല ക്ലിനിക്, വിദ്യാഭ്യാസ രംഗത്തെ വിപ്ലവകരമായ മാറ്റങ്ങൾ തുടങ്ങി ശ്രെദ്ധേയമായ പല പ്രൊജക്റ്റുകളും പാർട്ടി ഡൽഹിയിൽ നടപ്പിലാക്കി. ഡൽഹി മോഡൽ വികസനം പറഞ്ഞു പഞ്ചാബിലും അധികാരത്തിലേറി.

രാജ്യശ്രദ്ധ തന്നെ പിടിച്ചുപറ്റിയ പദ്ധതികൾ നടപ്പിലാക്കിട്ടും എന്തിനാണ് ജനം ആപ്പിനെ കൈവിട്ടത്? വാഗ്ദാനങ്ങളുടെ പെരുമഴ വീണ്ടും മുന്നിൽ വെച്ചിട്ടും എവിടെയാണ് കേജ്രിവാളിനു പിഴച്ചത്? ഇത്തരം ചോദ്യങ്ങൾക്കുള്ള ഉത്തരം വളരെ ലളിതമാണ്.
എന്തായിരുന്നു ആപ്പിന്റെ IDELOLODY? മറ്റു രാഷ്ട്രീയ കക്ഷികളെ പോലെ ഒരു ഐഡിയോളജിയും ആപ്പിന് ഉണ്ടായിരുന്നില്ല എന്നതായിരുന്നു യാഥാർഥ്യം! വികസനവും അഴിമതി വിരുദ്ധതയും മാത്രമായിരുന്നു അവരുടെ അജണ്ട. ഡൽഹി കലാപം നടന്നപ്പോഴും രോഹിഗ്യൻ അഭയാർത്ഥി പ്രശ്നത്തിലും പൗരത്വ പ്രക്ഷോഭ സമയത്തും തികച്ചും മൗനിയായിരുന്നു കേജ്രിവാൾ! അതുതന്നെയായിരുന്നു ആപ്പിന്റെ നയവും. ഹിന്ദുത്വ വികാരത്തെ മാക്സിമം ഡിസ്റ്റർബ് ചെയ്യാതിരിക്കുക, കൂടാതെ ഹനുമാൻ ചാലിസ , അയോദ്ധ്യയിലേക്ക് സൗജന്യ യാത്ര പോലെയുള്ള മൃദു ഹിന്ദുത്വ അജണ്ടകളും! ഒരു വശത്തു ഹിന്ദുത്വ അജണ്ട അതിന്റെ തീവ്രതയിൽ കൊണ്ടുനടക്കുന്ന ബിജെപി ഇതേ സൗജന്യങ്ങൾ ആവർത്തിച്ചപ്പോൾ ജനം,പ്രത്യേകിച്ചും മധ്യവർഗ്ഗം ഒന്നടങ്കം ബിജെപിയുടെ കൂടെ ചേർന്നു. ബഡ്ജറ്റിലെ ഇൻകം ടാക്സ് ഇളവുകളും കൂടെയായ പ്പോൾ അവർ പാർട്ടിയെ പൂർണ്ണമായും കൈവിട്ടു.

ന്യൂനപക്ഷങ്ങൾളും പാർട്ടിയെ വലിയ തോതിൽ കൈവിട്ടു. കോൺഗ്രസ്‌ പതിനാലോളം മണ്ഡലങ്ങളിൽ ആപ്പിന്റെ പരാജയത്തിനു കാരണമായി, കേജ്രിവാൾ ഉൾപ്പെടെ തോറ്റത് കോൺഗ്രസ്‌ വലിയ തോതിൽ വോട്ട് പിടിച്ചതിനാലാണെന്നു കണക്കുകൾ വ്യക്തമാക്കുന്നുണ്ട്. പക്ഷേ അവിടെയും സഖ്യമായി മത്സരിക്കാനുള്ള സാധ്യത തീർത്തും തള്ളിക്കളഞ്ഞത് ആപ്പ് തന്നെയാണ്. മറുവശത്തു കോൺഗ്രസ്‌ ആവട്ടെ പത്തു വർഷം മുൻപ് തങ്ങൾക്കു ‘ പണി ‘ തന്നവർക്കിട്ട് തിരിച്ചു പണിതു, കേജ്രിവാൾ ഉൾപ്പെടെയുള്ളവർക്കെതിരിൽ ഷീല ദീക്ഷിതിന്റെ മകനെ ഉൾപ്പെടെ രംഗത്തിറക്കി നല്ല മത്സരം തന്നെ കാഴ്ച വെച്ചു.വീണ്ടും പൂജ്യം സീറ്റ്‌ തന്നെ കരസ്ഥമാക്കിയെങ്കിലും ആപ്പിന്റെ തോൽ‌വിയിൽ വലിയ പങ്ക് വഹിച്ചു.ആപ്പ് തോറ്റതിലുള്ള കോൺഗ്രസ്‌ നേതാക്കളുടെ ഉള്ളാലെയുള്ള സന്തോഷം അവരുടെ പ്രസ്താവനകളിൽ നിന്ന് തന്നെ വ്യക്തം.

ആപ്പ് ഒരു സെക്കുലർ പാർട്ടി ആയിരുന്നില്ല ഒരിക്കലും, അതുകൊണ്ട് തന്നെ ഡൽഹിയിൽ ബിജെപി അധികാരത്തിൽ വന്നതിൽ മതേതര വിശ്വാസികൾക്കു പ്രത്യേക ദുഃഖത്തിന്റെ ആവശ്യമുണ്ടെന്നു തോന്നുന്നില്ല! ലൈറ്റ് ഹിന്ദുത്വ മാറി ഫുൾ ഹിന്ദുത്വയായി എന്ന് മാത്രം. എങ്കിലും ബിജെപിയെ തലസ്ഥാനത്തു നിന്നു അകറ്റാനുള്ള ഒരു അവസരം ഈഗോയുടെ പേരിൽ കോൺഗ്രസ്‌ ഉൾപ്പെടെയുള്ളവർ കളഞ്ഞു കുളിച്ചു എന്നത് വർത്തമാന ഇന്ത്യയിൽ അത്ര ശുഭകരമല്ല.